Mantenimento de equipos
	Manual de mantenimento de equipos informáticos	Manolo Paz 21/10/2002

Un cabo de rede é o medio que une as tarxetas dos ordenadores situados nunha rede. Como estamos a montar unha rede ethernet 10/100 empregaremos cabo de par trenzado con conectores rj45 en exclusividade, como o da imaxe (é semellante aos conectores telefónicos só que máis grande e con oito en lugar de catro contactos)  

O cabo de par trenzado é un cabo formado por oito delgados fíos que se distinguen pola súa cor. As cores acostuman ser laranxa, verde, azul, marrón, e outros catro bicolores co branco e as catro cores anteriores. Cada cabo monocolor leva o seu correspondente bicolor trenzado con el, por iso se denomina así. Podemos optar por fabricar nós mesmos o cableado ou por encargalo ou adquirilo xa feito. O prezo non é significativo para unha rede pequena e extensións de cabo non superior aos 10 m. por segmento.   

Tanto nun caso como no outro as únicas limitacións que teremos son:  
-Os segmentos de cabo deberán estar entre os 2 m. e os 100 m. de lonxitude. A maior distancia haberá problemas de perda de sinal.  
-O cabo terá distintas características se se trata de conectar só dous ordenadores entre si ou máis de dous ordenadores. 

Dos oito fíos do cabo só se empregan catro fíos para a transmisión de información, quedando os outros catro inutilizados. Os catro fíos empregados colócanse de distinto xeito nos conectores finais segundo o tamaño da rede que vaiamos crear. Dous dos catro fíos serven para a emisión dunha máquina dada (positivo e negativo) e os outros dous serven para a recepción (tamén positivo e negativo).  
Se imos unir só dous ordenadores, e unicamente dous, podemos conectar directamente a tarxeta do ordenador 1 coa do ordenador 2, sen outra necesidade que o cabo. Os fíos internos do cabo deberán ir cruzados, é dicir, emisión 1 con recepción 2 e recepción 1 con emisión 2. Isto denomínase cabo cruzado.  
Se imos unir máis de dous ordenadores, aparte das tarxetas e dos cabos precisaremos dun dispositivo externo que se encargue de facer os cruces das emisións e recepcións.  

   Este dispositivo chámase concentrador de rede ou "hub". Os cabos colocaranse entre cada unha das tarxetas e o concentrador nunha disposición que os especialistas denominan "rede con topoloxía en estrela (o hub no centro da estrela e os ordenadores nas puntas )". Neste caso os cabos denomínanse cabo directo ou normal, xa que os fíos de cores se colocan directamente emisión con emisión e recepción con recepción.   

Se imos adquirir ou encargar os cabos xa feitos, só haberá que precisar se o queremos normal (para ordenadores e hub) ou cruzado (unicamente para unir dous ordenadores).  

Se imos facer nós os cabos precisamos aparte dos metros necesarios do mesmo que haberá que cortar nos segmentos que fagan falta, os conectores para colocar nos extremos (do tipo RJ45) e unha ferramenta especial denominada tenaza de grimpado. Non é unha ferramenta cara, nin difícil de usar pero, como estamos montando unha pequena rede, sería interesante un empréstimo.  
Os contactos a conectar cos fíos son os seguintes : 

cabo normal  

1---Em+ ---blaranxa---- Em+----1 
2---Em- --- laranxa------ Em- ----2 
3---Re+ ----bverde ------ Re+ ----3 
6---Re- ---- verde  -------- Re- ----6 
      O resto dos fíos é indiferente como se conecten.   

cabo cruzado

1---Em+ ---blaranxa----- Re+ ----3 
2---Em- --- laranxa ------ Re- -----6 
3---Re+ ----bverde  ------ Em+ ----1 
6---Re- ---- verde   -------- Em- ----2 
        O resto dos fíos non se usan, polo que se poden conectar de calquer xeito .